بیر عوموردیر خلق دن مهر و محبت گورموشم

             اولچویه گلمه ز دئیم ، سونسوز حلاوت گورموشم

             خلقمین میثلی تاپیلماز دونیادا مین ایل کئچه

             بول جماعت ده عجیب جود و سخاوت گورموشم

             هر زمان توپراغیمیز تهدید اولوب دیر حددیده

             یئرتیجی قافلان کیمی اوندا شجاعت گورموشم

             وئرمئیب ظالم لره میدان بونو تاریخ دئیر

             دوشمنی سیندیرماغا گوجلو رشادت گورموشم

             تا گلیب لر میللتین بیرلیق تیفاغین پوزماغا

             وحدتین معناسینا عالی حمایت گورموشم

             بو جماعت یاخچلیق اخلاقینا مشهور اولوب

             مهربان انسانلارا گول تک طراوت گورموشم

             تبریز اولسون اردبیل ، زنجانلی اولسون هم دیلیم

             سوزلرینده باغلیلیق یوکسک قرابت گورموشم

             دانمیئیب آذر ائلی اوز اولدوغون هئچ بیر زامان

             بو صفت له بیرلیقا یاخچی دلالت گورموشم

             هر او کس کی یوردونو کتمان ائدیب دیر خلق دن

             عاقبت روسوای اولوب غرق ضلالت گورموشم

             شن دیاریم تبریزه فخر ائیلییر هر گون ( کیان )

             اصلینی هر کیم دانیب اوندا حماقت گورموشم

 

( کیان )



تاریخ : پنجشنبه 4 مهر 1398 | 12:18 ب.ظ | نویسنده : - | نظرات
.: Weblog Themes By BlackSkin :.